PORTO DE PORTONOVO

Portonovo atópase na mesma enseada que Sanxenxo, municipio ao que pertence. É o primeiro porto que atopamos na costa norte da Ría de Pontevedra. Porto pesqueiro e deportivo, dispón de abundantes servizos para o navegante que pode realizar no seu porto calquera reparación que precise.
Portonovo é unha zona turística e de veraneo de grande importancia. Nos seus arredores podemos gozar de fermosas praias como Silgar, Baltar, Caneliñas, Montalvo, Foxos ou A Lanzada.
Resultan de interese os conxuntos arquitectónicos civís e relixiosos de Adina, Nantes, Padriñán, Bordóns e Gondar. Neste municipio abundan restos arqueolóxicos do Paleolítico, por exemplo a biface acheulense de Randulfe e unha serie de mámoas que van desde a Punta de Montalvo ata o Faro de Noalla.